عبدالرحمن بن مساعد....شبيه الريح

. شبية الريح
وش باقي من الآلام
و التجريح
وش باقي من الأحلام
وش باقي من الأوهام
غير اني .. الاقي في هجيرك فيّ
الاقي في ظلامك ضيّ
و اوقد شمعتي في الريح
شبية الريح
اذا تسمح بغيب شوي
ابجمع همي الباقي
و ادفن صبري الذابل في أوراقي
و برجع لك اذا باقي بنفسك شي .


. شبية الريح
أنا مقدر أكدر صفوك العاصف
شبية الريح
أنا من لي سوى إحساسك الجارف
بقايا زيف أشواقي
سما أمطار أحداقي
شبية الريح وش باقي
ابي أعرف
متى تسكن رياحك
وابي أعرف
غرورك هو متى يطلق سراحك
و ابي أعرف
متى تعصف
متى تعطف
متى تنزف جراحك
و ابي أعرف
إذا باقي في بحرك موج اكسر فيه مجدافي
و ابي أعرف
إذا باقي في همك هم ماشالته أكتافي
و ابي أعرف
إذا باقي في هالدنيا حزن ما مرني و استوطن أطرافي
و ابي أعرف
إذا باقي من المعجز في هالدنيا
سوى العنقاء
و الا الغول
و الا خلك الوافي
بقايا زيف أشواقي
سما أمطار أحداقي
شبية الريح وش باقي ؟! .


. سنيني يم
و قلبي المركب المتعب و انت الريح
مجاديفي عذاب و هم
و زادي الوجد و التبريح
و صبري صبر بحّارة
بغوا في اليم محّارة
غشاهم موج كان من الغضب أغضب
و كانوا للهلاك أقرب
لولا كثروا التسبيح
شبية الريح
حبيبي الأصدق الأكذب
عجزت اوصل شواطي طبعك الأعذب
تعبت أنطر في وسط العاصفة
قلب و شعور و عاطفة
تعبت أجمع ألم كل الموادع
في المواني و أحضن أطيافك
تعبت السهد في ليل الشوارع
و الثواني تنطر انصافك
تعبت الظلم و اجحافك
شبية الريح
أنا ودي أكدر صفوك العاصف
شبية الريح
أنا كني نسيت إحساسك الجارف
بقايا زيف أشواقي
سما أمطار أحداقي
شبية الريح
كيف أسألك : وش باقي ؟
وأنا الباقي من إحساسي
ذرته الريح .

بدر بورسلي..كلك نظر ياساريه بليلة قمر

كلِّك نظر ياساريه بليلة قُمر 

عُمري بدا وعُمري انتهى بلمحِ البصر

شوفي وش سوَّا بي السَّهر

رِدِّي علي رِدِّي

وخذي العُمر كِلَّ العُمر مَهر

رحتي .. وشاغلني سُؤال

ألقاك أو هَذا مُحال

قلتي يصير

ولفحتي بالشعرِ الحرير

حسب الظُّروف .. ودخلني خوف

قلت الصَّبر .. قلت .. ياغاليه

رِدِّي علي رِدِّي

وخذي العُمر كِلَّ العُمر مَهر

ولهان أنا بالحيل ولهان 

خلَّيتي وقتي إنتِظار

الَّليل مَاهو ليل

ونهاري ماهو نهار

اشتِري عُمري اشتِريه

يا أمل أوله عليه

مِن عَرفتِك

وأنا ماعِندي سوالف إلا إنتِ

مِن عَرفتِك

شوقي وإحساسي سِكن وين ماسِكنتي

ويلي مِن الظَّروف

ياويلي والوقت يطوف

رِدِّي علي رِدِّي

وخذي العُمر كِلَّ العُمر مَهر

محمد سعيد الشراري

. ياللي رمتني بالغرام ونستني          
           حبك على قل الوصل مانسيته .

. ياليت كل الناس غيرك كوتني          
           ولا كواني بالبشر من هويته .

. حتى المواجع من عرفتك لقتني          
           افضل مكان الها خفووقن جفيته .

. حتى بيوت الشعر عقبك جفتني          
           ذاب الخفوق من الفراق ورثيته .

. عبره وغصت داخلي واخنقتني          
           من كبرها حتى الالم ماشكيته .

. ليت الليالي يالغلا طاوعتني          
           وامشي بحلمن شدني وامتطيته .

. لياليٍ مرت معك واوهمتني          
           ان الفرح شيد بهالقلب بيته .

. عقبك تلاشت فرحتي واخدعتني          
           دنياي في كذبة غرامن حييته .

. ملتني ابياتي وانا ماكفتني          
           وبداخلي جرحن سطا ماحكيته .

. شلت القلم صاغ الهمووم وغزتني          
           زود هموومي بالكتاب ورميته .

. شمعه وابي منها الدفا واحرقتني          
           شعرٍي مفصل للهموم وكسيته .

. هذي حياتي عشتها واتعبتني          
           امشي على درب الفر ج مالقيته .

. وياليت عجلات المنايا خذتني          
           ولا عرفت اغلا حبيب وبكيته .

حبيبي....يارسول الله...عليك أفضل الصلاة وأتم التسليم

بأبي أنت و أمي 

حبيبي يارسول الله 

اللهم صلِّ وسلم على سيدنا محمد عليه افضل الصلاة والسلام

وأحل له الشفاعة لنا يوم الحساب و أوردنا الحوض الأكبر معه 

نرشفة رشفة من يده لا ظمأة بعدها

اللهم اقسم لنا الخير كله انا واحبابي ومن مر من هنا والمسلمين 

والمسلمات يا ارحم الراحمين

اللهم آمن روعاتنا واستر عوراتنا وتوفنا مع الأبرار

اللهم آمــــــيـــــــــــــن

منصور الشادي...جاني كلام

جاني كلام اني معك كنت كذاب

  واني محملك الشقا والأسيّه 

واني أبيع الود و أبيع الأحباب

وش باقي ما قلته حبيبي عليّه

ظالم وأخاف عليك من يوم وحساب

ياخي حرام اللي تسويه فيّه

أرفع يديني طالب رب الأرباب

وأتذكر العشره وأنزل يديّ

شمّت فينا أغراب وأبعاد وأقراب

خليت ذا يحكي وهذي وذيّه

أهدي لك البسمه وتهدي لي أنياب

ليش الوفا في شرع مثلك خطيّه

الله بلاك بناس تفرش لك أهداب

والله بلاني بناس ماهي وفيّه

ياليت عندي شوي من غدر الأصحاب

وياليت عندك من وفايا شويّه

البدر....

في الليالي الوضح ..

والعتيم الصبح ..

لاح لي وجه الرياض ..

في مرايا السحب ..

كفّها فلة جديله من حروف ..

وقصة الحنا طويلة .. فـ الكفوف 

من نده عطر الرفوف ..

لين صحاه ..

في ثيابك يا الف ليله..

وفي الهبوب ..

انثنينا يا هبوب النعاس .. والحلم ..

ألف غصن من اليباس ..

فز لاجلك .. وانثنى ..

اكسري الاوهام كاس ..والمواجع فم

وان عشقتيني انا ..

ما ابي من الناس .. ناس ..

ما علينا .. لو طربنا وانتشينا 

آه .. ما ارق ( الرياض ) تالي الليل ..

انا لو ابي ..

خذتها بيدي .. ومشينا ..

***
يا نصيبي من الصور .. والرسايل

ومن كل شمس قايمه .. ومن كل ظلٍ مايل ..

يا مكاني من البيوت ..

ومن الصحاري اللي .. فرقت فكري قبايل ..

وين احب الليله .. وين اهيم ..

اقبلي مثل ديم ..

أو غصون النار تنبت فـ الغضى ..

وبين ما خلى من النخيل الفضا ..

وما نسى الغيم ..

أقبلي .. يا بختري عيوني من الربيع ..

وطل وجهي من الشتا ..

ومثل صوتي من الهبوب ..

اقبلي مثل الرياض ..

من تعاريج الدروب ..

في ضلوع الوادي ..

وين حبيتك قمر .. فوق طين أجدادي ..

***
وين احب الليله .. وين أهيم ..

ارفعي طرقة الشيله .. عن سديم ..

وكوبٍ وهاج ..
ا
قطعيني بنصل طرفٍ سادرٍ وحجاج ..

شقيقيني يالهبوب العارضية ..

واهدمني سياج ..

لين أغني الهوى ما هو خطيه..

يالعفاف اللي تسربل بالبياض ..

كل ما قربت يدينا ..

ناض طير.. وجض ريم ..

ما علينا ..

آه .. ما ارق الرياض تالي الليل ..

انا لو ابي ..

خذتها بيدها .. ومشينا

الشاعر / سعد بن هادي

. يقول من عاف الليال المعاسير           

           يوم انرمى بالذنب قبل اقترافه

يالله من همٍ يشقّ الأزارير           

           حتى طرد نومه وشرّد لحافه

ذي شهقة الأسحار لا زفرة عصير           

           الموت قدْمه والوله من خلافه

دعوىً غدت بين الهوى والمحاذير           

           والحكم صادر قبل يبدا اعترافه

يا رب يا عالم بكل الآسارير           

           بريء من حبل الهجر والتفافه

وش حيلة الشاعر من الثلث الآخير ؟           

           يزهم ولا أحدٍ جاوبه غير قافه

والمشكلة .. حتى الشعر عنده يحير          

           في وقت صار اللام يشبه لكافه

يا هجس .. ما لحقك من الجزل تقصير           

           دايم معي ما ذقت طعم الحسافة

لكنّ يا هجسي زمان الأعاصير           

           خلاني آعافك قبل لا اعافه

على الورق .. يا مدّعين الأساطير           

           كثافة الاقلام زادت كثافة !!

ساحة .. وغيم .. وعالم(ن) تحت تأثير           

           بْروق ورعود الحزِب وائتلافه

شعر(ن) بخير .. وشعر يصبح على خير          

           وشعرٍ تغذى عالوهَم والخرافة

ذا اليوم مدري هو أنا عاكس السير !!           

           والا إنّ خطي غير خطّ الصحافة !!

اللي طموحه بس وقفة وتصوير           

           والا مجلة عاامرة بالسخافة

واللي يشوف انّه كما عالي النير           

           واللي يعالج .. ما درى بإنه آفة !!

لا يحسب إنه هدّ من هدة الطير          

           اليا كفخ حدّه بعالي غلافه

أمير وهْم وجيت له قلت يا امير           

           ما ابيك تعطيني حقوق الضيافة

لكن ليا منّك لفيت الجماهير           

           اسأل عن غياب الشعر واعتكافه

الجو حالك لو بدا فيه تنوير           

           واطيب قصيدك جاير الفكر لافه

وش عاد باقي يا خوي المشاوير           

           من عقب جدْب القاف تزرع عجافه

يا داهنين السير .. ما يمشي السير           

           رجم الحصافة غير سهل العرافة

يا مشترينه بالذهب والدنانير           

           من وين أبلقى صرف لأجل احترافه ؟

انا رصيدي يوم اشوف الطوابير           

           تاقف لأجل حرفي حنين ولطافة

وانا رصيدي يوم تاج الغنادير           

           ترحم خفوقٍ ما درت بارتجافه

وانا رصيدي ما يكفيه تعبير           

           والحظ هذي طيحته وانعطافه

الشعر أنا .. لو كنت أنا ماني بخير           

           لا يا رجوم الفكر لا يا ضفافه

لو ما رشاشي ما اكتسى بالنواوير           

           ولا نسى روضه مصافح جفافه

أستأصل جذور العنا والمقادير          

          وأراقبه وأدراه من قبل اخافه

لو ما قصيدي ينطح الفكر ويغير           

           ما كان حرفي ينعرف باختلافه

جرحي .. ودمعي .. والبلا صدري البير           

           خلّى ابتساماتي مجرد ثقافة !!

حاولت أبين للفرح أيّ تقدير           

           لكنّ بين اسمي وبيني مسااافة !!

حتاّم يا قلبي ابي منك تحرير           

           وأشوف معْك اللي ولا رجْل شافه

ما زعزعنّي كبر أبانات والنير           

           لكن تزعزعني ولا منك رافة

قيّدتني .. وانا حفيد المناعير           

           وحرمتني شرب الهنا وارتشافه

وكسرتني كسر ماينفعه تجبير           

           وفرّحت بي عاذل / وحاقد / وتافه

متى على الله تطلق القيد واسير           

           إلى متى زرعك ما حان انقطافه ؟

أنا تعبت أحلم بعش العصافير           

           وأصحى على ظلمك ويأس انتصافه

أبي أعيش الواقع بدون تغيير           

           أخاصمه / وأرضيه / وأنسى خلافه

ابي أشوف الفرق من واقع الغير           

           شف كيف عيشتهم بليّا كلافة

أصغر طموحي : أهتني حزة عصير          

           وأكبر طموحي : ليل ماني أخافه !! .